Ambasada e Francës në Kosovë ka dhuruar donacion me pajisje mjekësore për Ministrinë e Shëndetësisë. Donacioni është pranuar nga ministri në detyrë Armend Zemaj.
Ministria e Shëndetësisë ka pranuar një donacion me pajisje mjekësore nga Franca të cilat do të ndihmojnë përballjen me koronavirusin.
Ministri në detyrë i Shëndetësisë, Armend Zemaj, i cili ishte i pranishëm në pranimin e këtij donacioni, ka falënderuar shtetin e Francës dhe ambasadoren e këtij shteti në Kosovë, Marie-Christine Butel, për ndihmën e vazhdueshme.
Ai tha se ky donacion do ta lehtësojë punën e personelit shëndetësor në përballje me pandeminë.
“Ky donacion në vlerë të konsiderueshme është shumë domethënës për neve dhe qytetarët. Është shumë i mirëseardhur. Ky donacion do ta lehtësojë punën e punëtorëve shëndetësorë në përballje me pandeminë. Donacionet janë stimulim për neve për përballje me koronavirusin në këtë periudhë, kur kemi një situatë më të qetë”, tha Zemaj.
Zemaj tutje tregoi se çfarë pajisjesh përmban donacioni.
“Ne emër të Ministrisë së Shëndetësisë dhe të Qeverisë i falënderoj shumë dhe shpresoj që këto pajisje dhe mjete mbrojtëse, si oksigjen-gjenerator, oksigjen-formues, termometra të ndryshëm dhe maska për oksigjen, do ta lehtësojnë punën e profesionistëve shëndetësorë në trajtimin e pacientëve qoftë ata COVID apo pacientëve të tjerë të cilët kanë nevojë për këso lloj trajtimi që nevojitet oksigjeni. Ditët edhe kaluara edhe këto ditë të vitit 2021 po marrim donacione të ndryshme që janë stimulim për ne dhe punën tonë të përbashkët dhe vazhdimin me betejën me Coronavirusin deri në eliminimin e plotë të tij”, tha Zemaj.
Donacioni përmban koncentratorë oksigjeni, maska për oksigjen, maska kirurgjikale, maska me filtrim FFP2, dorëza, pulsoksimetra, termometra dhe rroba mbrojtëse, material i domosdoshëm në përballje me COVID-19.