Dr. Skender Asani përkujton Ukshin Hotin

Sot kujtojmë një emër të veçantë të botës shqiptare. Është Ukshin Hoti, lavdia e të cilit nuk rresht së frymëzuari edhe në ditët e sotme, kur kujtojmë me pietet përvjetorin e zhdukjes së tij.
Për të risjellë në vëmendjen e opinionit publik emrin dhe veprën e Ukshin Hotit, është kujdesur edhe Dr. Skender Asani, drejtori i ITSHKSH në Shkup, i cili përmes një statusi në FB, ka shkruar:

“Para 22 viteve, pikërisht në ditën e sotme, më 16 maj 1999, është hera  fundit që është parë duke dalë nga burgu i Dubravës dhe prej asaj dite emri i Ukshin Hotit ndodhet në listën e personave të zhdukur.
Ky kolos i çështjes kombëtare, me mungesën e tij fizike e intelektuale, do të mbetet një prej korifenjve të rrallë të mendimit politik shqiptar. Konceptet dhe idetë e tij politike e filozofike ishin ngushtësisht të lidhura me aspiratat shtetndërtuese të shqiptarëve, kudo që ndodhen ata, prandaj sot kur përkujtojmë mospraninë e tij fizike, mundohemi disi ta kompensojmë këtë duke emërtuar një prej rrugëve të Shkupit  me emrin e Ukshin Hotit.  Shkupi i Dardanisë së lashtë nuk do ta harrojë asnjëherë këtë kolos të çështjes kombëtare, sepse vetëm duke e risjellë në  vëmendjen e gjeneratave të mëvonshme emrin e tij, plotësojmë edhe një amanet ndaj të gjithë atyre që sakrifikuan për mirëqenien tonë kombëtare, ku pa dyshim bën pjesë edhe arkitekti i mendimit politik shqiptar – Ukshin Hoti”, ka shkruar Dr. Asani.

Leave a Comment

Your email address will not be published.