Largimi i barrikadave ishte paralajmëruar të nisë sot, por në mëngjesin e së enjtes dy kamionët e vendosur tek vendi i quajtur “Kërshi i Dudës” janë djegur.
Policia e Kosovës ka dhënë detaje për djegien e barrikadës te “Kërshi i Dudës”, gjatë ditës së sotme.
Në njoftimin e lëshuar thuhet se janë djegur dy kamionë, dhe se nuk ka persona të lënduar.
“Bazuar në informacionet zyrtare, në mëngjesin e hershëm është raportuar se në lokacionin e quajtur “Shkëmbi i Dudës” në Mitrovicën e Veriut janë djegur dy mjete të rënda (kamionë), të cilët kanë qenë të vendosur në barrikadë”.
“Përveç dëmeve materiale nuk raportohet për lëndime, përderisa rasti është duke u hetuar”, transmeton Klankosova.tv
Vendosja e barrikadave nga grupe kriminale serbe u bë pas arrestimit të ish policit Dejan Pantiq, i dyshuar për sulm ndaj institucioneve të Kosovës, saktësisht zyrave të KQZ në veri të vendit.
Më shumë se 10 barrikada të vendosura nga këto grupe penguan qarkullimin e lirë të njerëzve, ndërkaq edhe reagimi ndërkombëtar në këtë drejtim ishte i dobët.
Për largimin e barrikadave ka folur mbrëmë edhe zëvendëskryeministri i Kosovës, Besnik Bislimi, i cili është shprehur optimist se barrikadat e vendosura në veri të Kosovës do të largohen të enjten.
Ai tha se qytetarët e Kosovës do të kenë arsye për të festuar, teksa shtoi se protestat paqësore janë më të dobishme se sa vendosja e barrikadave.
Ndërkaq, presidenti i Serbisë, Aleksandar Vuçiq, mbrëmjen e 28 dhjetorit në kazermën e Ushtrisë Serbe në Rashkë, afër kufirit me Kosovën, zhvilloi bisedimet me përfaqësuesit e serbëve nga Kosova për heqjen e barrikadave.
Ai pas takimit me përfaqësuesit e serbëve nga Kosova, tha se heqja e barrikadave në veri të Kosovës do të nisë mëngjesin e së enjtes.
“Për 24 orë apo 48 orë do të hiqen barrikadat”, tha ai, duke shtuar se janë dhënë garanci se kërkesat e serbëve për heqjen e barrikadave do të plotësoheshin.
Dejan Pantiq të mërkurën u lirua në arrest shtëpiak, nga masa e paraburgimit. Prokuroria ka dal me një deklaratë ku theksojnë se Dejan Pantiq u dërgua në arrest shtëpiak për shkak të aspektit human, pasi i njëjti kishte probleme shëndetësore. /Telegrafi/