Kryeministri i Kosovës, Albin Kurti, ka thënë se zhvillimte e fundit në veriun e vendit mund të jenë të lidhura me planin franko-gjerman. Kjo pasi sipas tij, Serbia nuk po dëshiron të angazhohet në dialog.
“Ka mundësi që ata nuk dëshirojnë të angazhohen në mënyrë konstruktive në dialog dhe tash kanë zgjedhur këtë rrugën tjetër, por unë besoj që të dëgjueshmit e tyre, janë pakrahasimisht strukturat e ndryshme ilegale, se sa qytetarët e vendit tonë që janë me përkatësi etnike serbe”, tha ai, raporton RTKLive.
Kreu i qeverisë, tha se do të dështojnë përpjekjet e Serbisë për destabilizim të Kosovës.
“Unë e di që një përpjekje e tillë do të jetë e pasukseshme, shteti ynë është i fortë duke qenë demokratik, duke qenë i rreshtuar me SHBA, NATO dhe BE. Kurse liberalizimi i vizave është diçka tjetër, dhe besoj se kjo sagë do të përmbyllet dhe nuk ka lidhje që bëhet në Kosovës, ndoshta në Beograd besojnë një gjë të tillë”, tha ai.
Ai ka bërë me dije se ka pranuar kerkesa nga qytetarët serbë të Kosovës dhe që kanë kërkesa për çështje të ndryshme. “Unë nuk kam marrë letra për vendime për targat nga qytetarët serb të Kosovës”, tha Kurti në Prizren.