Parlamenti Evropian me një rezolutë të miratuar kërkon sërish heqjen sa më të shpejtë të regjimit të vizave për qytetarët e Kosovës, ndërsa përshëndët aplikimin e vendit për status kandidati në Bashkimin Evropian. Nga BE kërkohet që mos të vazhdojë me procesin e negociatave të anëtarësimit përderisa Serbia nuk vendosur sanksione ndaj Rusisë.
Mbështetet arritja e një marrëveshje mes Kosovës dhe Serbisë në kuadër të dialogut, përmes njohjes së ndërsjellë, ndërsa në tekst thuhet edhe se Pavarësia e Kosovës është e pakthyeshme. Njëkohësisht kërkohet nga pesëshja e mbetur evropiane që të njohë pavarësinë e Kosovës.
Këto janë pjesë të rezolutës për Politikën e Jashtme dhe të Sigurisë, e cila është miratuar në seancën plenare të mbajtur në Strazburg.
Fokus i kësaj rezolutë është kërcënimi që paraqet agresioni rus ndaj Ukrainës në politikën e BE-së.
Në këtë rrafsh i bëhet thirrje Serbisë që që të respektojë vlerat evropiane dhe të përshtatë politikën e saj të jashtme me atë të Bashkimit Evropian ndërsa nga BE kërkohet që mos të vazhdojë me procesin e negociatave të anëtarësimit përderisa Serbia nuk vendosur sanksione ndaj Rusisë.
Nëse Serbia nuk e harmonizon politikën e saj të jashtme me politikën e jashtme dhe të sigurisë të BE-së, kam frikë se do të ndjekë rrugën e Turqisë, e cila është kandidate për anëtarësim për më shumë se 30 vjet, thotë Klemen Groshelj, eurodeputet nga Sllovenia.
Paralajmërimi i tij vjen pasi Parlamenti Evropian votoi Raportin mbi Zbatimin e Politikës së Përbashkët të Jashtme dhe të Sigurisë të BE-së, i cili kërkon vendosjen e sanksioneve kundër Federatës Ruse si kusht për përparimin në procesin e integrimit evropian.
“Para së gjithash, është një mesazh për Serbinë që nëse vërtet dëshiron të anëtarësohet në BE dhe se procesi i negociatave për anëtarësim në BE është në rrugën e duhur, atëherë duhet të harmonizojë politikën e saj të jashtme me politikën e jashtme të BE-së. Përndryshe, kam frikë se Serbia do të ndjekë rrugën e Turqisë, e cila ka më shumë se 30 vjet kandidate për anëtarësim dhe nuk do të bëhet kurrë”, tha Groshelj për Nova.rs, transmeton Ballkani.info.
Ai thotë se nëse Serbia nuk e ndryshon qëndrimin e politikës së jashtme, mund të mos ketë bllokadë zyrtare, por nuk do të hapen kapituj të rinj në negociata.
“Kjo në fakt do të thotë se nuk ka përparim në negociatat dhe se rruga e Serbisë drejt BE-së në fakt po ngrin. “Serbia do të jetë në pozitën e një kandidati për anëtarësim në vitet e ardhshme, sepse gjërat në Ukrainë ndoshta nuk do të zgjidhen dhe një zgjidhje e pranueshme nuk do të arrihet shumë shpejt”, thekson Groshelj.
“Do të ishte shumë më mirë që Serbia ngadalë të fillojë procesin e harmonizimit të politikës së saj të jashtme me politikën e BE-së. Përndryshe, kam frikë se do të ketë një ndalesë de facto të negociatave për anëtarësim në BE. Serbia mund të bëhet dëm kolateral i pushtimit rus të Ukrainës për shkak të mos-angazhimit të politikës së jashtme. Për këtë arsye negociatat de fakto do të ngrihen dhe në praktikë kjo do të thotë që nuk do të hapen kapituj të rinj në negociata”, thotë Groshelje dhe shton se kjo është shumë keq për Serbinë, sepse nuk dihet se sa do të zgjasë lufta në Ukrainë dhe cili do të jetë rezultati përfundimtar i saj.
Kujtojmë se rezoluta e miratuar sot në PE shpreh keqardhje për respektimin e ulët të Serbisë me Politikën e Përbashkët të Jashtme dhe të Sigurisë të BE-së, veçanërisht në lidhje me luftën e agresionit të Federatës Ruse kundër Ukrainës.
“(PE) thekson rëndësinë e harmonizimit të plotë të vendeve të Ballkanit Perëndimor me politikën e jashtme dhe të sigurisë të BE-së, veçanërisht politikën e sanksioneve ndaj vendeve të treta; shpreh keqardhje për nivelin ende të ulët të përputhshmërisë së Serbisë me politikën e jashtme dhe të sigurisë të BE-së, veçanërisht në lidhje me luftën e agresionit të Federatës Ruse kundër Ukrainës”, thuhet në raport.
Ashtu si në dokumentet e mëparshme të miratuara nga Parlamenti Evropian, edhe ky paraqet qëndrimin se në cilat kushte Serbia duhet të hapë kapituj të rinj negociues. Dhe nuk ka të bëjë vetëm me qëndrimin ndaj Rusisë.
“PE përsërit qëndrimin e tij se kapitujt e mëtejshëm të negociatave duhet të hapen vetëm kur Serbia të forcojë angazhimin e saj për reformat në fushat e demokracisë dhe sundimit të ligjit dhe të tregojë përputhje të plotë me politikën e përbashkët të jashtme dhe të sigurisë; rikujton se Serbia, si vend që përpiqet për integrim evropian, duhet t’u përmbahet vlerave dhe të drejtave të përbashkëta të BE-së”, thuhet në rezolutën e miratuar.
Me anë të Rezolutës së miratuar eurodeputetët gjithashtu i bëjnë thirrje BE-së që të vendos sanksione ndaj presidentit të entitetit serb në Bosnjë e Hercegovinë, Milorad Dodik për shkak të, siç thuhet, veprimeve që rrezikojnë unitetin dhe integritetin territorial të Bosnjës, shkruan Telegrafi.
Rezoluta e Parlamentit Evropian është miratuar me 407 vota pro, 92 vota kundër dhe 142 abstenime.
Ndonëse kanë simbolikë politike, rezolutat e Parlamentit Evropian nuk janë ligjërisht obliguese për institucionet e BE-së e as për vendet anëtare.