Ministri i Shëndetësisë, Arben Vitia në një konferencë për media ka njoftuar se lajmi i publikuar për anulimin e vaksinave Pfizer është i pavërtetë.Ministrja e Punëve të Jashtme, Donika Gërvalla ka reaguar pas disa raportimeve se Vitia ka refuzuar të nënshkruar një marrëveshje me kompaninë Pfizer.Gërvalla thotë se këto raportime janë të pavërteta dhe sipas saj ministri Vitia po bënë maksimumin që Kosova të mos e humb asnjë vaksinë.
Vitia ka deklaruar se një lajm i tillë dëmton procesin e negocimit të vaksinave antiCOVID.
“Sot në vend të një konferencë për të treguar për masat e reja, më duhet të flas për një lajm të pavërtetë, i cili është i dëmshëm për procesin e vaksinave. Lajmi i publikuar në Gazetën Insajder është i pavërtetë, i dëmshëm dhe dashakeq”, tha ai.
Ministri u shpreh se tashmë është themeluar komisioni për negocimin e vaksinave kundër COVID-19 dhe se janë duke punuar në sigurimin e vaksinave. Gjithashtu, ai tha se nuk mund të jap detaje tjera pasi që të dhënat janë konfidenciale.
“Ata që kanë publikuar të dhënat për sigurimin e vaksinave kanë rrezikuar sigurimin e tyre, e po ashtu shëndetin e qytetarëve. Ftojmë Prokurorinë e Shtetit të veprojë dhe të mbrojë interesat e qytetarëve”, shtoi Vitia.
Ministri i Shëndetësisë, Arben Vitia nuk ka dhënë detaje sa i përket negocimit për sigurimin e vaksinave. Ai nuk ka treguar se me cilat kompani të tjera po negociohet, por që siguroi se ka buxhet të mjaftueshëm.
“Ka buxhet të mjaftueshëm dhe buxheti nuk ka qenë në asnjë moment problemi sa i përket sigurimit të vaksinave”, ka deklaruar ai.
“Unë e kuptoj kërshërinë e juaj dhe të qytetarëve për data ekzakte, por ne jemi këtu për të punuar për të siguruar sa më shpejt vaksinën. Nuk mund të dalim të dhëna konfidenciale sepse ata janë betuar për konfidencialitet”, ka thënë Vitia.
“Përfitues përveç shteteve të tjera do të jetë Kosova me një sasi e cila do të vijë…. Qëndroj prapa këtyre fjalëve që një pjesë do të vie në prill, e pjesa tjetër në maj”, tha ai.
Ai ka thënë se mos respektimi i masave anti-Covid është rrezik për shëndetin e qytetarëve.
Ndryshe, gjatë ditës është raportuar se ministri Arben Vitia nuk ka nënshkruar kontratë me kompaninë Pfizer dhe BioNtech, ku sipas tyre, e gjithë puna për furnizim me vaksina është kryer dhe duhej vetëm që Vitia të nënshkruante kontratën të cilën nuk e ka bërë. Si pasojë e kësaj, furnizimi me vaksina do të shtyhet deri në shtator.
Ministrja e Punëve të Jashtme, Donika Gërvalla ka reaguar pas disa raportimeve se Vitia ka refuzuar të nënshkruar një marrëveshje me kompaninë Pfizer.
Gërvalla thotë se këto raportime janë të pavërteta dhe sipas saj ministri Vitia po bënë maksimumin që Kosova të mos e humb asnjë vaksinë.
Madje ajo thotë se është dëshmitare e nënshkrimit të ministrit Vitia në kontratën që mundëson sigurimin e këtyre vaksinave.
Krye diplomatja ka akuzuar qeverinë paraprake për vonesa në procesin e sigurimit të vaksinave e që sipas saj qeveria aktuale i ka përmirësuar ato ngecje.
Tutje ka thënë se të premten ka qenë pjesë e një konference me institucione të BE-së me ministrat e Ballkanit Perëndimor ku kanë biseduar për sigurimin e vaksinave.
“Përmbajtja e konferencës është konfidenciale dhe natyrisht që nuk do ta shkel konfidencialitetin e premtuar. Ju siguroj që Qeveria e Republikës së Kosovës dhe mbi të gjitha Ministri i saj i Shëndetësisë Arben Vitia kanë ndërmarrë të gjithë hapat e nevojshëm dhe kanë plotësuar të gjitha kushtet formale për të mos humbur as edhe një vaksinë të vetme për qytetarët e Republikës. Përkundrazi, të gjitha zvarritjet dhe pengesat e paraardhësve tanë të pakujdesshëm i kemi elemininuar dhe në këtë aspekt jemi në një hap me të gjithë fqinjtë tanë”, ka shkruar Gërvalla.
Postimi i plotë i Gërvallës
Vaksinat dhe të pavërtetat rreth tyre
Absolutisht asgjë të vërtetë nuk ka në akuzat e sotme drejtuar ministrit Vitia, se gjoja nuk paska nënshkruar një kontratë të caktuar dhe në këtë mënyre paska rrezikuar ardhjen e një kontigjenti të caktuar vaksinash. Jam dëshmitare e nënshkrimit të Ministrit Vitia ty ku ky nënshkrim është dashur të vihet.
Sot, si Ministre e Punëve të Jashtme kam qenë pjesë e një konference me institucione të BE-së me ministrat e Ballkanit Perëndimor. Kemi biseduar vetëm rreth vaksinave. Përmbajtja e konferencës është konfidenciale dhe natyrisht që nuk do ta shkel konfidencialitetin e premtuar.
Ju siguroj që Qeveria e Republikës së Kosovës dhe mbi të gjitha Ministri i saj i Shëndetësisë Arben Vitia kanë ndërmarrë të gjithë hapat e nevojshëm dhe kanë plotësuar të gjitha kushtet formale për të mos humbur as edhe një vaksinë të vetme për qytetarët e Republikës. Përkundrazi, të gjitha zvarritjet dhe pengesat e paraardhësve tanë të pakujdesshëm i kemi elemininuar dhe në këtë aspekt jemi në një hap me të gjithë fqinjtë tanë.
Informacionet e portaleve të ashtuquajtura “informative” janë duke manipuluar me gjendjen e rëndë të pandemisë dhe frikën e qytetarëve nga pasojat e sạj.
Më lejoni që me përgjegjësi të plotë t’ju siguroj, si e përfshirë në të gjitha proceset e sigurimit të vaksinave, që as edhe një rrjesht i vetëm nga publikimet e sotme nuk është i vërtetë. Ministria e Shëndetësisë nuk ka rrezikuar asnjë afat të vetëm dhe të gjithë së bashku do të shohim gjatë ditëve në vijim rezultatin e përpjekjeve kolosale për sigurimin e vaksinave për të gjithë qytetarët e Republikës. Spekulimet e përmendura janë thjesht të pavërteta.
Lus portalet e ndryshme që në vend të shpërndarjes së gënjeshtrave të heshtin kur nuk janë të gatshëm të ndihmojnë. I bëj thirrje Ministrisë së Shëndetësisë që të kërkojë përgjegjësi ligjore nga të gjithë ata që me shpërndarjen e gënjeshtrave përpiqen të krijojnë panik të panevojshëm dhe të destabilizojnë vendin.
Së fundi, nga përvoja e fituar gjatë javëve të fundit, dëshiroj të falënderoj Ministrin Vitia dhe të gjithë e ekipin e Ministrisë së Shëndetësisë për angazhimin kolosal në përballimin e pandemisë dhe pasojave të saj.